युवापुस्ताको मनोविज्ञान र समसामयिक जीवनकथालाई पर्दामा उतार्ने तयारीमा रहेका निर्देशक बलिराम चौहानको नयाँ चलचित्र ‘ल्याङ्ग ल्याङ्ग’मा अभिनेता सन्तोष बानियाँ मुख्य भूमिकामा अनुबन्ध भएका छन्।
सोमबार निर्माण पक्ष र बानियाँबीच औपचारिक सम्झौता भएको हो। यसअघि अभिनेता रियान गिरीलाई पनि चलचित्रको प्रमुख भूमिकामा अनुबन्ध गरिएको जानकारी निर्माण पक्षले सार्वजनिक गरिसकेको थियो।
सन्तोष र रियान दुवैले चलचित्र ‘होस्टेल ३’बाट एकसाथ नेपाली चलचित्र क्षेत्रमा डेब्यु गरेका थिए। पहिलो चलचित्रपछि फरक–फरक प्रोजेक्टमा व्यस्त बनेका यी दुई कलाकार अब ‘ल्याङ्ग ल्याङ्ग’मार्फत पुनः एउटै पर्दामा देखिने भएका छन्।
स्काइफल पिक्चर्सको प्रस्तुतिमा निर्माण हुने चलचित्रको स्लोगन ‘हरेक युवाको कथा’ राखिएको छ। नेपाली युवापुस्ताले साथीभाइबीच हुने अनावश्यक किचकिच, एउटै विषयमा बारम्बार दिइने दबाब वा मानसिक तनावलाई बुझाउन ‘ल्याङ्ग ल्याङ्ग’ शब्द प्रयोग गर्ने गर्छन्।
चलचित्रको कथा बलिराम चौहान र उपाश्री खतिवडाले संयुक्त रूपमा लेखेका हुन्। हाल चलचित्रको प्रि–प्रोडक्सन र कलाकार छनोटको काम तीव्र रूपमा भइरहेको छ।
निर्देशक चौहानले भने, “अहिले हामी कलाकार र प्राविधिक टिमलाई पूर्णता दिने क्रममा छौँ। केही स्थापित र केही प्रतिभावान नयाँ अनुहारहरूसँग कुरा भइरहेको छ। छिट्टै हामी सम्पूर्ण टिमको औपचारिक घोषणा गरेर छायांकनमा निस्कनेछौँ।”
