दाङको दङ्गीशरण गाउँपालिका–३, चखौरामा रहेको थारू सांस्कृतिक सङ्ग्रहालय केवल पुराना सामग्री थन्क्याइएको ठाउँ होइन, यो थारू समुदायको जीवन्त इतिहास बोल्ने खुला पाठशाला हो ।
थारू समुदायको कला, संस्कृति, रहनसहन, परम्परा र पहिचानलाई पुस्तौँसम्म जोगाइराख्ने उद्देश्यले स्थापना गरिएको यो सङ्ग्रहालय अहिले इतिहास संरक्षणको केन्द्र मात्र नभई लुम्बिनी प्रदेशकै आकर्षक पर्यटकीय गन्तव्य बनेको छ । प्रदेश सरकारको लगानीमा स्थापना भएको सङ्ग्रहालयमा अहिले दैनिक रूपमा आन्तरिक तथा बाह्य पर्यटकको चहलपहल बढ्दो छ भने यसले आफ्नो आम्दानीबाट सरकारी लगानीसमेत फिर्ता गर्न थालेको छ ।
थारू समुदायको सांस्कृतिक सम्पदालाई भावी पुस्तासम्म सुरक्षित राख्ने उद्देश्यले सङ्ग्रहालयमा नेपालका थारु समुदायले परम्परागत रूपमा प्रयोग गर्दै आएका भेषभूषा, गरगहना, घरायसी सामग्री, कृषि औजार तथा लोपोन्मुख सांस्कृतिक वस्तुहरू संरक्षण गरेर राखिएका छन् ।
