नेपालले काभा महिला भलिबल च्याम्पियनसिपमा चिरपरिचित प्रतिनिद्वन्द्वी भारतसँगको पहिलो खेलमा हार बेहोरेको छ ।
त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा शुक्रबार भएको खेलमा नेपाल भारतसँग ३-२ सेटमा हारबाट काभा महिला भलिबल च्याम्पियनसिपको सुरुआत गरेको हो । समूह ‘ए’ को खेलमा नेपालले पटकपटक चुनौती दिए पनि भारतलाई पार गर्न सकेन । यस समूहमा आयोजक नेपालसँगै भारत, किर्गिस्तान र माल्दिभ्स छन् । अब नेपालले समूहको दोस्रो खेल मे २३ तारिखमा हुनेछ ।
पहिलो सेट आफ्नो बनाउँदै नेपालले अग्रता लिएको थियो । पहिलो सेट नेपालको पक्षमा २५-२१ ले रह्यो । तर, दोस्रो र तेस्रो सेटमा नेपालले खराब डिफेन्स प्रस्तत गर्यो । यसको फाइदा लिँदै खेलमा फर्कियो र लगातार दुई सेट पनि जित्यो । दोस्रो सेट २५-२० र तेस्रो सेट २५-१९ ले आफ्नो बनाउँदै भारतले दबाब बनायो । सेटमा २-१ ले पछि परेसँगै घरेलुु समर्थक निरास भए । यद्यपि चौथो सेटमा नेपाली खेलाडी लयमा फर्किए । यो सेटमा डिफेन्स सुधार गर्दै नेपाली खेलाडीले जोशिलो प्रदर्शन गरे । यो सेट नेपाललाई २५-१९ ले आफ्नो बनाउँदै निर्णायक तथा पाँचौ सेटतर्फ धकेल्यो । यससँगै खेल २-२ को सेटमा पुग्यो । तर, पाँचौ सेट निकै निराशाजनक रह्यो । भारतले यो सेटमा १५-९ ले आफ्नो बनाउँदै च्याम्पियनसिपमा सुखद सुरुवात गर्यो ।
काभा महिला भलिबल च्याम्पियनसिपमा घरेलु समर्थकको बलियो साथमा च्याम्पियन हुने लक्ष्य राखेको छ । यद्यपि डिफेन्डिङ च्याम्पियनसँगको हारपछि हारपछि नेपाललाई धक्का लागेको छ ।
नेपाल भलिबल संघ (एनभिए) को आयोजनामा काठमाडौंमा शुक्रबारदेखि सुरु च्याम्पियनसिप जेठ १५ गतेसम्म हुनेछ । आठ राष्ट्रले प्रतिस्पर्धा गरिरहेको च्याम्पियनसिपको नेपाली टोलीमा युवा र नयाँ खेलाडीको बाहुल्यता छ । नियमित कप्तान अरुणा शाही विदेश पलायन भएपछि उनको स्थानमा निरुता ठगुन्नाले नेपालीको नेतृत्व गर्दैछिन् । तर निरुताको प्रदर्शन राम्रो हुन सकेन । यस संस्करणमा श्रीलंका, बंगलादेश, किर्गिस्तान, भारत, इरान, कजाखकिस्तान र माल्दिभ्सले चुनौती प्रस्तुत गर्नेछन् । समूह ‘बी’ मा इरान, काजकिस्तान, श्रीलंका र बंगलादेशले प्रतिस्पर्धा गर्नेछन् । पहिलो दिन नै इरानले बंगलादेशलाई ३-० सोझो सेटमा हराउँदै सुखद सुरुवात गरेको छ ।
यस प्रतियोगितालाई लक्षित गर्दै भलिबल संघले २० खेलाडीलाई समेटेर बन्द प्रशिक्षण सुरु गरेको थियो । उक्त प्रशिक्षण गत चैत ५ गतेदेखि प्रशिक्षण सुरु भएको हो । यस च्याम्पियनसिप खेल्ने अन्तिम टोली १४ सदस्यीय छनोट भइसकेको छ । नेपालमा तेस्रो पटक हुँदै छ । नेपालले पाँच पटक सहभागिता छ । दुई पल्ट नेपाल च्याम्पियनसिप हो ।
नेपाली टोलीका मुख्य प्रशिक्षक जगदीश भट्टले यसपल्ट पनि च्याम्पियन हुने लक्ष्यसहित तयारी गरिएको बताएका छन् । नियमित कप्तानसँगै अनुभवी सेटर अरुणा शाही टोलीमा छैनन् । अरुणा नेपाली भलिबलमा फर्किने या नफर्किने भन्नेबारे अहिलेसम्म संघले र उनले पनि खुलाएकी छैनन् । उनको स्थानमा प्रगति नाथले सेटरको भूमिका निभाउनेछिन् । अरुणासँगै अर्का महŒवपूर्ण र अनुभवी खेलाडी पुनम चन्द पनि टोलीमा छैनन् । दुवै हाल अस्ट्रेलियामा छन् । नेपालले बलियो प्रतिद्वन्द्वी भारतसँग खेल्दै यस च्याम्पियनसिपको यात्रा सुरु गर्नेछ ।
नवनियुक्त कप्तान निरुताले भारतविरुद्ध यसअघिको जस्तै जोशिलो प्रदर्शन गर्ने आशा व्यक्त गरेकी छिन् । नयाँ जिम्मेवारीले आफूमा कुनै दबाब नभएको उनको विश्वास छ । पहिलो दिन नै किर्गिस्तान र माल्दिभ्सबीच तथा इरान र बंगलादेशबीच प्रतिस्पर्धा हुने तालिका छ । दुवै समूहका शीर्ष दुई टोलीले सेमिफाइनलमा स्थान बनाउनेछन् । प्रतियोगिताको फाइनल खेल जेठ १५ गते आयोजना हुनेछ ।
