शुक्रवारबाट प्रदर्शनमा आउन लागेको चलचित्र ‘लालीबजार’ को रिलिज २२ गतेसम्मलाई रोक्न उच्च अदालत पाटनले अल्पकालीन अन्तरिम आदेश दिएको छ ।
डा. रोशनी नेपाली वादी लगायत वादी समुदायका केही अभियान्ताहरुले चलचित्रविरुद्ध रिट निवेदन हालेका थिए ।
‘लालीबजार’ले वादी समुदायलाई नैतिक, सामाजिक र व्यवहारिक रूपले गलत देखाएको उनीहरूको आरोप छ । रिट निवेदक रोशनीले भनिन्, ‘यो चलचित्रले वादी समुदायलाई नैतिक, सामाजिक र व्यवहारिक हिसाबले एकदमै गलत देखाएको छ । यो चलचित्र कतै पनि प्रदर्शन हुनुहुन्न । चलचित्रलाई रोक्नकै लागि हामीले अदालतको ढोका ढकढक्याएका हौँ ।’
उच्च अदालतले अगामी २२ गते दुवै पक्षलाई छलफलका लागि बोलाएको छ । त्यतिन्जेलसम्म चलचित्र प्रदर्शन नगर्न आदेश गरिएको छ । ‘लालीबजार’को आज आयोजना गरिएको प्रिमियर शो निर्माण पक्षले क्यान्सिल गरेको छ ।
