रञ्जिता श्रेष्ठ नेतृत्वको नागरिक उन्मुक्ति पार्टी छाडेर रेशम चौधरीले नागरिक उन्मुक्ति पार्टी नेपाल गठन गरेका थिए । सोही पार्टी लिएर उनी चुनावमा गए । उनको उम्मेदवारी सरकारले रद्द गरिदिए पनि उनी पार्टीलाई जिताउन खटिए । राजेन्द्र महतो नेतृत्वको राष्ट्रिय मुक्ति पार्टी नेपाल र अशोक राई नेतृत्वको जनता समाजवादी पार्टीसँग मिलेर एउटै चिह्नमा चुनावमा भाग लिए, तर यो गठबन्धनले एक सिट पनि जितेन ।
पार्टी किन कमजोर भयो ? निर्वाचनमा कहाँ चुक भयो ? लगायत विषयमा रातोपाटीले उनै चौधरीसँग कुराकानी गरेको छ ।
- गत फागुन २१ गतेको चुनावमा थरुहट, मधेसलगायत शक्ति सखाप भए । तपाईंहरूबाट कहाँ चुक भयो ?
–यसमा मैले केही न केही मात्रामा दुवै पक्षको भुल भएको देख्छु । जनताको तीव्र आकांक्षा देश एकदम छिटो स्वर्ण युगमा परिवर्तन भइजाओस्, रातारात छुमन्तरजस्तै देश बनिहालोस् भन्ने तीव्र आकांक्षा देखिएको छ भने अर्कोतिर वर्षौँदेखि शासन गर्दै आएका पुराना शक्तिहरूले मुलुक परिवर्तनका लागि भूमिका नखेलेका र दिनप्रतिदिन आफ्ना शक्तिहरू विस्तारित गर्दै सम्पूर्ण क्षेत्रमा हस्तक्षेप गरेका कारण जनता चिढिएका थिए ।
जनता चिढिएको बेला, जनताले विकल्प खोजेको बेलामा एउटा नयाँ शक्ति, एउटा नयाँ अनुहारलाई जनताले रुचाए । त्यसमा केही कुराहरू जस्तै चुनावी एजेन्डा, विकासका नाराहरू दिए । यसभन्दा पहिले भएका चुनावमा यसलाई प्रधानमन्त्री बनाउने भनेर प्रचार गरिएको थिएन । यसपालि ‘अबकी बार बालेन सरकार’ को नारा जोडतोडले लाग्यो । त्यसले सम्पूर्ण मधेस र थरुहटलाई पनि तरंगित बनायो ।
- तपाईंहरू किन शून्यमा झर्नुभयो त ?
– म त स्पष्ट भन्छु कि हामीसँग भएको एजेन्डा र मुद्दालाई जनतासमक्ष पुर्याउन सकेनौँ, बालेनको स्टाइलमा जनतालाई बुझाउनै सकेनौँ । म त पार्टीको संरक्षक मात्र थिएँ, तर हाम्रा निर्वाचित जनप्रतिनिधिहरूले पनि पार्टीको रणनीति र एजेन्डालाई जनतामाझ पुर्याउन सक्नुभएन । हाम्रो रणनीति र योजना यो हो, हाम्रो कार्यदिशा यो हो भनेर जनतालाई बुझाउनै सकेनौँ । जनताले पहिले हामीलाई विश्वास गरेकै थिए र अहिले पनि विश्वास गरेकै छन् । तराई मधेसका जनतामा एउटा निराशा छाएको थियो । जब राज्यले मेरो उम्मेदवारीलाई खारेज गर्यो अनि जनतालाई लाग्यो, अब रेशम चौधरी नै उम्मेदवार नभएपछि अरूलाई जिताउँदा के फरक पर्छ भन्दै थरुहटका जनताले नयाँ शक्तिलाई साथ दिएका हुन् । थरुहटबाट अधिकांश सांसद नागरिक उन्मुक्ति पार्टीका नेताहरू नै हुनुहुन्छ ।
