महानायक राजेश हमालले देशको शासन प्रणाली दूरदृष्टि, तथ्यमा आधारित निर्णय र दीर्घकालीन रणनीतिका आधारमा सञ्चालन हुनुपर्ने बताएका छन्।
बिहीबार सामाजिक सञ्जाल फेसबुकमार्फत आफ्नो धारणा सार्वजनिक गर्दै हमालले देशलाई ‘हिट एन्ड मिस’ अर्थात् अन्दाज र परीक्षणको भरमा सञ्चालन गर्नु बुद्धिमानी नहुने उल्लेख गरेका छन्।
उनले कुनै पनि राष्ट्रको भविष्य संयोगका भरमा नभई स्पष्ट दृष्टिकोण, तथ्यमा आधारित निर्णय र दीर्घकालीन योजनामार्फत निर्माण हुने बताए।
हमालका अनुसार आगामी ५, १० वा २० वर्षमा देश कहाँ पुग्ने भन्ने स्पष्ट योजना र यथार्थपरक पूर्वानुमानबिना केवल दैनिक समस्याको व्यवस्थापनमै सीमित हुँदा मुलुकको समग्र विकास प्रभावित हुन सक्छ।
