लामो समयदेखि उपभोक्ताहरुले झेल्दै आएको डाटा सकिएपछि स्वतः ब्यालेन्स काटिने झन्झटिलो समस्यालाई समाधान भएको छ ।
सञ्चार तथा सूचना प्रविधि मन्त्री डा. विक्रम तिमिल्सिनाले नेपाल टेलिकमका प्रयोगकर्ताहरुका लागि डाटा सकिएपछि स्वतः ब्यालेन्स काटिने झन्झटिलो समस्यालाई समाधान भएको भनेर सामाजिक सञ्जालमार्फत सार्वजनिक गरेका छन् ।
उनले लेखेका छन, ‘अबदेखि ग्राहकहरुले आफ्नो मोबाइलको मुख्य मौज्दात (मेन ब्यालेन्स) सुरक्षित राख्नका लागि आफैँले ‘पे एज यू गो’ सेवा बन्द गर्न सक्ने व्यवस्था मिलाइएको छ ।’
नेपाल टेलिकमका ग्राहकहरुले डाटा प्याकेजको सीमा सकिएको पत्तै नपाई मोबाइलमा रहेको व्यालेन्स सकिने समस्या थियो । ग्रहाकले प्याक सकिएपछि व्यालेन्स कटिदा आर्थिक भार खेप्दै आएका थिए । झुक्किएर डाटा अन हुँदा वा प्याकेज सकिएको सूचना ढिलो प्राप्त हुँदा उपभोक्ताको व्यालेन्स काटिने गरेको थियो ।
यो गुनासोलाई लिएर मन्त्री डा. तिमिल्सिनाले मन्त्रालय र टेलिकम प्रशासनलाई उपभोक्तामैत्री संयन्त्र बनाउन निर्देशन दिएका हुन् । सोही बमोजिम अब ग्राहकले आफ्नो नियन्त्रणमा रहने गरी यो नयाँ सुविधा लिन सक्ने छन् ।
यो नयाँ सुविधा लिनको लागि ग्राहकले आफ्नो मोबाइलबाट *४४४# डायल गरी उपलब्ध विकल्पहरू मध्ये चौथो नम्बरमा रहेको विकल्प छनौट गरेर उक्त सेवालाई अक्षम गर्न सक्नेछन् । यो प्रक्रिया पूरा गरेपछि ग्राहकको डाटा प्याकेज सकियो भने इन्टरनेट स्वतः चल्न बन्द हुनेछ ।
